Frítíðartilboðið á Høgabóli

Frítíðartilboðið á Høgabóli er ætlað børnum við autismu, menningartarni, ADHD og downsyndromi, sum ganga í 3. til 10. flokk (í løtuni er eisini onkur, sum gongur í serbreyt á miðnámi). Høvuðsendamálið er at menna teirra sosialu, málsligu og sálarligu førleikar við einum skipaðum gerandisdegi.

Ætlan og virkisætlan
Ætlanir og virkisætlanir á Høgabóli eru væl skrivaðar. Tó vanta virkisætlanirnar møguliga at vera meira eins, og tað vantar ein støðugari kunning til foreldrini um virkisætlanirnar. 

Arbeiðshættir og háttalag
Arbeiðshættirnir eru lagaðir til tørvin hjá hvørjum einstøkum barni. Dentur verður lagdur á at skapa tryggar og skipaðar karmar, har bæði trivnaður og menning hava hægstu raðfesting. Tó vantar tilboðið eina meira greiða námsfrøðiliga høvuðsstevnu. Foreldur kundu hugsað sær meira kunning um, hvat hendir í gerandisdegnum.

Trivnaður og menning hjá borgarum
Børnini trívast sera væl og fáa jaligar og mennandi upplivingar, bæði við dagligum virksemi og útivirksemi. Dentur verður lagdur á sosiala og persónliga menning, sjálvbjargni og sjálvsálit. Bæði børn og foreldur siga frá einum sera tryggum og umsorganarfullum umhvørvi.

Fakliga arbeiðið hjá starvsfólkunum
Starvsfólkini hava viðkomandi førleikar og trívast væl. Tey arbeiða miðvíst við at tryggja jalig sambond og at viðurkenna hvønn einstakan. 

Leiðsla og organisatión
Leiðslan er væl skipað og leggur stóran dent á opinleika, tryggleika og góðar samstarvshættir. Eindarleiðslan arbeiðir við felags námsfrøðiligum tilgongdum, og staðbundna leiðslan er sjónlig og stuðlar starvsfólkunum. Ymiskt er enn í menning, eitt nú innføring av KRAP (Kognitiv, Ressourcefokuseret og Anerkendende Praksis) og ‘skjalfest’-journalskipanin, men leiðslan hevur greiðar ætlanir og arbeiðir miðvíst ímóti hesum málum.

Tilmælir og áheitanir
Mælt verður til at ætlaða KRAP-háttalagið verður væl innført og at halda á við góða trivnaðinum – bæði millum børn og starvsfólk.

Mælt verður til at kunna foreldrini meira um, hvat hendir til dagligt. Her er ein talgild loysn uppløgd. 

Eingin áheitan verður givin um, at nakað er kritiskt og skal fáast í rættlag beinanvegin. 

Viðmerkingar frá Almannaverkinum
Viðvíkjandi tí talgildu loysnini, sum eftirlitið vísir á, so er frítíðartilboðið farið undir at royndarkoyra appina ”Intra”. Arbeitt verður við at fáa fígging til, at hetta verður útbygt.