Mýrisóljan

Mýrisóljan veitir dagtilboð og umlætting til børn og ung við fjølbreki, menningartarni og autismu. 

Ætlan og virkisætlan
Allir borgarar hava persónliga ætlan/virkisætlan, sum verða tillagaðar og eftirmettar regluliga. Í Mýrisóljuni eru virkisætlanir væl skipaðar og lagaðar til námsfrøðiligu tilgongdina í tilboðnum. Starvsfólk hava góð amboð til at seta mál og lutmál fyri húsfólkini, sum tryggjar støðuga menning og trivnað.

Arbeiðshættir og háttalag
Arbeiðshættirnir í Mýrisóljuni eru væl grundaðir á KRAP (Kognitiv, Ressourcefokuseret og Anerkendende Prakis) og ASK (Alternativ og Supplerende Kommunikation), og tey miða eftir at fáa ein meira skipaðan gerandisdag. Hesi háttaløg tryggja tryggleika og støðufesti fyri húsfólkini. Samskifti og menning verða sett í miðdepilin, og starvsfólk arbeiða miðvíst við at laga arbeiðið til einstaka borgaran, við denti á jaligar relatiónir og samskiftistøkni.

Trivnaður og menning hjá borgarum
Húsfólkini trívast væl í bæði dagtilboðnum og umlættingini. Felags tiltøk og persónlig dagsskrá verða skipað soleiðis, at húsfólkini bæði kenna seg trygg og mennast, við støði í sínum førleikum og áhugamálum. Avvarðandi og húsfólk vísa á, at trivnaðurin er sera góður, og at starvsfólk eru nærverandi og professionell í samskifti og røkt.

Fakliga arbeiðið hjá starvsfólkum
Starvsfólkini í Mýrisóljuni hava breiða vitan um námsfrøði, heilsurøkt og alternativt samskifti, og tey fáa regluliga møguleika at menna sínar førleikar. Leiðarin stuðlar starvsfólkunum í at varðveita eitt høgt fakligt støði, og starvsfólkini hava møguleika fyri supervisjón og ‘debriefing’. Samstundis verður dokumentatión í ‘skjalfest’-journalskipanini brúkt effektivt til at tryggja framhald í arbeiðinum.

Leiðsla og organisatión
Leiðslan er væl skipað við greiðum ábyrgdarbýti millum eindarleiðslu og staðbundna leiðslu. Starvsfólk kenna leiðaran sum stuðlandi og sjónligan, og leiðslan leggur dent á at viðlíkahalda tað góða arbeiðið – samstundis sum fokus verður sett á at styrkja fakligu menningina og tryggja eina góða samskipan millum Mýrusóljuna og avvarðandi.

Tilmælir og áheitanir
Ongi tilmælir og áheitanir verða givin. Tilboðið er sera gott. Starvsfólk og leiðari eru reflekterandi og varug við, at námsfrøðiliga arbeiðið er viðbrekið, og at borgarar í tilboðnum skjótt kunnu fáa avbjóðingar, ið starvsfólk og leiðari skulu taka atlit til.