Sambýlið og búfelagsskapurin á Mýrini

Á Mýrini eru bútilboð til vaksin við menningartarni. Endamálið er at veita fólki eitt varandi og gott heim, har tey kunnu liva eitt sjálvstøðugt og virkið lív. Tilboðið er býtt í tveir partar: eitt sambýli við 12 plássum og ein búfelagsskapur við 5 plássum.

Ætlan og virkisætlan
Ætlanir og virkisætlanir eru væl grundaðar, men virkisætlanir eru ikki heilt lidnar fyri øll húsfólkini. Tær virkisætlanir, ið eru gjørdar, eru vælskrivaðar og leggja dent á tørv og mál hjá tí einstaka, men tørvur er á eini meiri einsháttaðari tilgongd.

Arbeiðshættir og háttalag
Arbeiðshættirnir eru væl tillagaðir málbólkinum og taka støði í námsfrøðiligum amboðum so sum KRAP. Fokus er á at skapa struktur og sjálvbjargni við vegleiðing og stuðli til uppgávur í gerandisdegnum. Hóast KRAP enn ikki er íverksett til fulnar, er arbeiðslagið væl skipað og veitir eitt gott grundarlag fyri menning.

Trivnaður og menning hjá borgarunum
Húsfólkini trívast væl og hava fortróligar relatiónir við starvsfólkini. Starvsfólkini arbeiða miðvíst eftir at menna sjálvbjargni hjá húsfólkunum og tryggja, at teirra ynskir og tørvir verða tikin við í avgerðir. Tað kundu verið skipað fleiri tiltøk tvørtur um lonir og búfelagsskapin til tess at styrkja felagsskapin enn meira.

Fakliga arbeiðið hjá starvsfólkum
Starvsfólkini hava viðkomandi førleikar og arbeiða saman í einum sterkum fakligum og sosialum hópi. Leiðslan stuðlar teimum við vegleiðing eftir tørvi. Starvsfólk meta, at tørvur er á upplæring, sum er meira skipað, um ávís evni.

Leiðsla og organisatión
Leiðslan er sterk og sjónlig. Eindarleiðslan stuðlar staðbundnu leiðsluni væl, og organisatiónin vísir eitt sterkt samstarv millum leiðslu og starvsfólk. Tað er greitt ábyrgdarbýti, og leiðsluhátturin skapar eitt skipað og effektivt bútilboð, sum arbeiðir miðvíst við menning og trivnaði hjá bæði húsfólkum og starvsfólkum.

Tilmælir og áheitanir
Mælt verður til, at allar virkisætlanir verða skrivaðar, og at tilboðið hevur eitt felags forstáilsi av virkisætlanum. 

Mælt verður til at kanna trivnaðin hjá øllum og at kanna, um tað er møguligt í summum førum at knýta húsfólk saman tvørtur um lonir og møguliga eisini tey í búfelagsskapinum. 

Somuleiðis verður mælt til at tosa við avvarðandi um, hvussu samskiftið við tey skal vera.

Eingin áheitan verður givið um, at nakað er kritiskt og skal fáast í rættlag beinanvegin. 

Viðmerkingar frá Almannaverkinum
Síðani eftirlitið varð framt, hava vit gjørt meira við at knýta húsfólk saman tvørtur um lonir, við ymiskum aktivitetum. 

Farið verður nú í gongd við at gera allar virkisætlanirnar lidnar, har vit eisini fáa upplæring frá undirvísara í, hvussu tær kunnu gerast.
 
Øll bútilboðini í eindini fara áleið í mars 2025 at seta á skrá eitt avvarðandi ráð, og eins og undanfarin ár fara vit aftur at hava avvarðandi fundir.