Sambýlið og búfyriskipanin í Stoffalág

Sambýlið í Stoffalág hevur trý pláss umframt eina serskipan til ein persón. Sambýlið veitir tænastur til vaksin við menningartarni, har høvuðsendamálið er at veita húsfólkunum eitt heim, har tey kunnu liva eitt sjálvstøðugt, trygt og virkið lív. 

Ætlan og virkisætlan
Í Stoffalág hava húsfólkini vælskrivaðar virkisætlanir, sum eru gjørdar við námsfrøðiligum umhugsni. Virkisætlanirnar verða eftirmettar og tillagaðar regluliga, og starvsfólkini arbeiða miðvíst við at seta mál, sum stuðla menningini hjá húsfólkunum. 

Arbeiðshættir og háttalag
Arbeiðshættirnir í Stoffalág byggja á námsfrøðiligar tilgongdir sum KRAP, Boardmaker og low arousal. Hesir arbeiðshættir tryggja, at húsfólkini verða møtt við jaligum sambondum og viðkomandi námsfrøðiligum arbeiði, ið stuðla trivnaðinum. Starvsfólkini eftirmeta javnan og leggja dent á at laga virksemið til tørvin hjá tí einstaka. 

Trivnaður og menning hjá borgarum
Trivnaðurin hjá húsfólkunum í Stoffalág er sera góður, og húsfólkini eru virkin í sosialum og menningarligum tiltøkum. Starvsfólkini stuðla teimum í at hava eina skipaða dagsskrá og at luttaka í frítíðarvirksemi uttan fyri sambýlið. Húsfólkini verða hoyrd og vird í sínum ynskjum og førleikum, og hetta hevur við sær jaliga menning og gott samskifti. Avvarðandi eru sera nøgd við trivnaðin og samskiftið við sambýlið.

Fakliga arbeiðið hjá starvsfólkum
Starvsfólkini hava viðkomandi førleikar innan menningartarn, autismu o.l., og tey hava javnan møguleika fyri eftirútbúgving og supervisjón. Arbeiðið er væl skipað við greiðum arbeiðsgongdum, og tey nýta amboð sum Boardmaker og ‘skjalfest’ journalskipanina til at tryggja framhald og góðsku í arbeiðinum. Starvsfólkini arbeiða væl saman og stuðla hvørjum øðrum, og tey hava góð viðurskifti við leiðaran, sum er sjónligur og stuðlandi.

Leiðsla og organisatión
Leiðslan í Stoffalág er væl skipað við greiðum ábyrgdarbýti millum eindarleiðslu og staðbundna leiðslu. Leiðarin samstarvar væl við starvsfólkini og tryggjar, at tey fáa neyðuga vegleiðing og amboð til arbeiðið. Samskiftið millum starvsfólkini og leiðaran er opið og byggir á álit, og leiðarin arbeiðir miðvíst við at styrkja sambýlið við tillagingum og menningartiltøkum.

Tilmælir og áheitanir
Mælt verður til at skriva eitt skjal, ið fevnir um alt tað, sum tilboðið rúmar. Hetta kann til dømis gerast til ein faldara til nýggj starvsfólk, avvarðandi, samstarvsstovnar og lesandi í starvslæru.

Eingin beinleiðis áheitan verður givið um, at nakað er kritisk og skal fáast í rættlag beinanvegin.